СООПШТЕНИЕ ДО ЈАВНОСТ

По повеќе од шест месеци од поднесената Иницијатива на Левица за оспорување на контроверзниот Закон за попис на населението, домаќинствата и становите во Република Мекедонија, Уставниот суд на РМ – за утре (четврток, 8 јули 2021 година), со почеток во 10:00 часот, закажа подготвителна седница за разјаснување на правните прашања по овој предмет, согласно член 29 од Деловникот на судот, а во име на подносителот на претставката – на истата ќе учествува и проф. д-р Димитар Апасиев, како поканет претставник од Левица.

Инаку, Левица го оспори овој закон уште во јануари 2021 година, и тоа по четири основи: (1) дека спроведувањето попис сред пандемија е кривично дело, бидејќи оваа масовна теренска операција го загрозува јавното здравје; (2) дека Законот за попис е во директен судир со три специјални закони за кризен менаџмент, кои задолжително се применуваат во услови на здравствена криза, со што ја загрозува правната сигурност на граѓаните и го подрива владеењето на правото; (3) дека Законот е во судир со задолжителните норми на меѓународното право и со воспоставените интернационални стандарди на кои лажно се повикува; и (4) дека Законот ја повредува приватноста на граѓаните во очигледен несразмер со поставените статистички цели, заради штимање на резултатите и фабрикување на реалноста преку процес на лажиран етноинженеринг.

Искрено се надеваме и јавно го повикуваме Уставниот суд да постапи во склад со своите уставни овластувања и барем еднаш да се одважи и да биде вистински „чувар на Уставот“, поништувајќи го овој шверцерски донесен закон – така што ќе отвори правен пат за разумно одлагање на пописот во догледна иднина и за донесување на комплетно нов закон, во кој ќе бидат инкорпорирани сите меѓународни препораки и стандарди на ЕУРОСТАТ и на Обединетите Нации.

ПОЛИТИЧКА ПАРТИЈА ЛЕВИЦА
7 јули, 2021