Една од клучните цели кон кои што се стреми потпишаниот протокол е образованието. Јасно е воочлива намерата за систематизирана индоктринација на младите во насока на неутрализација на националното чувство.
Програмата за соработка во образованието 2022-2025, која на 23-ти март од оваа година во Софија ја потпишаа министерот Јетон Шаќири и министерот Николај Денков, до ден-денес не е достапна за пошироката јавност, но, стои во капитулантскиот Протокол како веќе постигнат успех во рамки на соработката.
Пред две години, беше формирана Заедничка мултидисциплинарна експертска комисија за историски и образовни прашања. Нејзината работа во Протоколот е оценета како „под очекувањата“, па оттука ѝ се дадени конкретни задачи.
Двете држави, преку надлежните министерства и единиците на локалната самоуправа, во рок од две години, да ги вклучат сите веќе меѓусебно договорени резултати од работата на Комисијата, во согласност со чл. 8 ал. 2 од Договорот, во учебните програми, учебници и релевантните учебни материјали, а резултати да се рефлектираат врз содржините на натписи на споменици, знаци, информациски материјали во музеи и други објекти со образовно и културно значење, како и релевантните информации во електронски информативни медиуми во јавна сопственост.
Договорените резултати претставуваат бришење на македонската и старословенската историја и прифаќање на бугарскиот експанзионизам за научна вистина. За пример: „Владата на Република Македонија ќе подготви и достави прелиминарен урнек од лекција за 7 одделение од образовната програма на Република Македонија на тема Самоилова држава, во согласност со препораката на Комисијата, во согласност со чл. 8 ал. 2 од Договорот.
Дополнително, со тоа што Протоколот предвидува и „Рехабилитација на жртвите на репресии во комунистичкиот период“ можно е во новите учебници, скроени по теркот на велепредавството, народните херои од НОБ да бидат прогласени за терористи, а докажаните фашисти како Ванчо Михајлов да бидат прогласени за национални херои!
Јасна е намерата на бугарската страна, а јасно е и велепредавството од страна на неизбраната Влада на Македонија. Со научни девијации кои имаат за цел да спроведуваат политичка агенда треба да се реагира остро и ригорозно – тие треба да бидат отфрлени како штетни и опасни.
22.07.2022г.
