Добредојдовте на официјалната веб-страница на Левица

More

    АНДРЕА ЈАНКОВ
    кандидат за градоначалник на Општина Центар

    Накратко би се опишал како страствен љубител на природата и верник во самоодржливост и неинванзивност како концепти на создавање и градење на општините и државата во целина. Креативен, исполнителен и детален во работата. Основач и претседател на здружението на граѓани „Го Сакам Водно“. Оженет и татко на две деца.

    Роден сум во 1982 година во Скопје, Општина Центар. За општината ми се врзани скоро сите најдраги спомени од детството и младоста. Магистер инженер архитект, со магистерска теза од областа на самоодржливта и неинвазивна архитектура, одбранета на УКИМ – Архитектонски факултет – Скопје, каде завршив и додипломски студии. Овластен проектант и инженер за изведба со Овластување Б од Комора на овластени инженери и архитекти на Република Македонија.

    Над 14 години работно искуство како проектант и инженер за изведба во приватниот сектор: „ЗАМ-ИНЖЕНЕРИНГ“ ДОО (2007-2010), „МЕГА-ЗАМ“ ДОО (2010-2013), „ЗАМ-ДИЗАЈН“ ДОО (2013-2016), „МЕНХЕТЕН ПРОЕКТ“ ДООЕЛ (2016-2020), „ЕЛЕНА ЛУКА ИНЖЕНЕРИНГ“ (2020-тековно). Осoбено горд на проктирањето на црквата (Св. Архангел Гаврил) во Ченто.

    Учесник на протестите на „Прва Архи Бригада“ од 2009 годиниа, „Паркобрани“, „Го Сакам ГТЦ“, еден од иницијаторите на движењето „Не низ Водно“ од 2018, за борба против изведба на гасоводот по сртот на Водно. Основач и претседател на здружението на граѓани „Го Сакам Водно“ (ГСВ). Преку ГСВ се залагам за зачувување на природата, а особено на парк-шума Водно и носење на закон за негова заштита во форма на lex specialis.

    Оженет и татко на две деца – ќерка (5 години) и син (2 години).

    Мотивација за вклучување во политика

    Ми пречат т.н. професионални политичари (оние кои политката ја сфаќаат како алатка за градење кариера, наместо како орудие за градење на општеството), устоличени олигарси и корумпиран “стручен“ кадар, „Миле/Зоки ми текна“ политики и тендер-демократија. Се активирам за да направам промена, општествениот дискурс да биде квалитетна политика, а не политикантство, за да поттикнам волонтеризам и солидарност, наспроти алчност и опортунизам, во сите пори на општеството. Сметам дека ингеренциите мора да се вратат на стручните лица, наместо кај т.н. професионални политичари, кои реално немаат професија, туку зависат исклучиво од тоа дали се или не се на власт. Да се врати довербата во стручниот кадар, а меѓу другите и кај архитектонската фела, со што повторно би добиле градови наместо угушени урбани паланки.

    Што сакам да постигнам и променам во моето опкружување и општеството?

    Мојата желба и борба е Центар да се развива во духот на космополитизмот кој му го даде впечатливиот лик по земјотресот, кога светски архитектонски имиња проектираа на негова територија, наместо фаст-фуд анонимни архитекти. Сакам да се обелоденат сите задкулисни игри кои се воделе и се водат во рамки на општината и држвата, онака како што тоа започна да го прави Левица и во Собранието на Република Македонија. Сакам да имаме општина со дух, услови за живеење и архитектура по мерка на човекот, каква што заслужуваме, а не по мерка на алчни инвеститори и корумпирани стручњаци. Сметам дека задолжително е потребно воспоставување на мерит систем (знаење – резултати – напредок) и вработување врз база на јавни конкурси, каде ќе можат да се натпреваруваат и победат најдобрите, наместо делење на тендери на “нашите/вашите“ и окупирање на државата и институциите од нестручен кадар заради поседување на “соодветна партиска книшка“.

    Ле Корбизје рекол „архитектура или револуција“. Јас сум поблизок до кредото „архитектура И револуција“.

    Зошто ја избрав и се кандидирам преку Левица?

    Најдобриот период во кој сме се чувствувале и слободни и горди како граѓани, во кој ни било дозволено и овозможено да се развиваме како стручњаци, е период во кој се практикувале левичарските идеали, на единство, солидарност и елан за себеостварување, каде човекот беше мерка за сѐ. Не смееме да заборавиме со чиј труд и самопожртвуваност е изградено сѐ она кое дури и погрешните политики водени веќе 30 години сѐ уште не можат да го урнисаат, иако својски се трудат. Левица и луѓето во неа, се единствената опција која вистински застапува левичарски идеи, со здрава доза на патриотизам и љубов кон татковината – Република Македонија. Практикување на конзумеризам, алчност и отуѓеност се покажаа погубни за нас, и сметам дека е време да се вратиме на правиот пат. Тоа ни е аманетот уште од НОВ и АСНОМ.

    Мојата порака до народот

    Време е сите заедно да го напуштиме црно-белиот светоглед на досегашните политички мастодони кои веќе 30 години ги гледаме во ДПМНЕ и СДС, затоа што како и на мастодоните, и нив им е судено да исчезнат! Што побрзо, тоа подобро за сите нас. Потребно е конечно да се одважиме и без страв да гласаме за Левица, како единствена политичка опција која потекнува и е создадена од народот – за народот. Политичката историја нѐ учи дека само партија со чесни и храбри луѓе, може да победи корумпирана партија. Не постои општество кое се развило преку давање глас за корумпирани политичари, ниту пак исклучиво на основ на граѓански организации. Потребно е да изградиме систем од институции кои работат во полза на народот, а тоа најдобро се прави од позиција на власт. Мора да внимаваме во чии раце ја даваме власта. Време е заедно со Левица, конечно да си ги вратиме општините и државата во рацете на народот, каде и припаѓаат.