Реакција на советникот од Левица, Саше Јанчев, до претседателот на Советот по повод неставањето на дневен ред на точката чија цел е носење одлука седниците да се емитуваат во живо. Во прилог говорот:

“Почитуван претседателе,
Особено вие претседателе, ова е процедурално и се однесува на вас. Јас согласно член 23, ст. 1, ал. 2 од Статутот, кој што ми дава право да поднесувам иницијативи за ставање точки на дневен ред, уредно, лично до вас преку мејл и преку архива, поднесов иницијатива за ставање точка на дневен ред, но спротивно на чл 59, ст. 2 од Деловникот, кој вика дека претседателот на Советот ги става сите прашања на дневен ред кои што му се доставени од предлагачите и градоначалникот, точката не ми ја ставивте на дневен ред.

Претседателската функција не е приватна работа и не може со неа да си прави кој што сака. Баш напротив, таа е многу одговорна. Претседателот на Советот е должен да ги почитува Законот, Статутот и Деловникот, особено он е најповикан да ги почитува оти во спротивно ќе настане неред, а претседателот ќе биде генератор на тој неред.

Тоа е така затоа што има разлика помеѓу животинска заедница и човечка заедница, човечкото општество. Таа разлика е во тоа што човечкото општество функционира врз основа на општествен договор, а општествен договор е се, почнувајќи од највисокиот акт, Уставот, преку закони и подзаконски акти, па се до статут и деловник на општина. Тоа е рамката во која заедницата нормално функционира и кога ќе се прекрши таа рамка се создава ненормална ситуцаија која е проблематична затоа што таа си повлекува сама по себе ненормална реакција со цел ситуацијата да се врати во нормала. Или како што вика еден австриски неуролог и психолог, ненормална реакција на ненормална ситуација е сосем нормална работа.

Единствено нешто што превенира моја таква реакција е тоа што сме во краен рок за носење на Буџетот и носењето на Буџетот е во моментов од поголем јавен интерес од кршењето на моето деловничко право.

Но се надевам дека во иднина нема да ми биде кршено тоа право како би се превенирала ненормална реакција, а со цел нормално да функционираме.”

По реакцијата кажано беше од претседателот на Советот дека точката ќе биде ставена на дневен ред на наредна седница.