Инфлацијата и задолжувањата се основните обележја на предлог буџетот за 2023 година

Инфлацијата и задолжувањата се основните обележја на предлог буџетот за 2023 година

Во Предлог Буџетот за 2023 година, Владата проектира 35 отсто повисоки приходи во споредба со претходната година, иако Бесими вели дека нема да се воведат нови даноци, но можно е да се укинат дел од даночните ослободувања.

Повисоките проекции за даночни приходи, се темелат на повисока даночна основа за пресметка на данок, поради повисоките цени, а неданочните приходи бележат значајно зголемување кај глобите, судските и административните такси и други невладини услуги.

Главен виновник за дел од приходите е проектираната инфлација, која оди во прилог на власта, затоа што повисоките цени носат и повисоки даночни и неданочни приходи.

Но, ова не е сè. Апетитите на власта се далеку поголеми и не можат да ги покријат своите мегаломански потреби со инфлаторните движења, па затоа ќе ги задолжат идните генерации за покривање на буџетскиот дефицит и за раздолжување на долговите, односно за отплата на главницата и каматите.

За капитален развој не останува простор, затоа, место да се планираат развојни проекти од јавен интерес, ќе се доделуваат капитални субвенции на претпријатија и невладини организации, најчесто блиски до власта. Без да се спроведе мониторинг за користење на овие средства, ефектот ќе биде само богатење на одредена група „среќно избрани“.

Од приходната и расходната страна на Предлог Буџетот, јасно се гледа дека на удар ќе биде обичниот човек, кој едвај крпи крај со крај. Зголемувањето на цените ќе го погоди сиромашниот, како и укинувањето на даночните ослободувања, кои на некој начин беа увертира во прогресивното оданочување.

Без даночни реформи и воведување на прогресивен данок, само ќе се продлабочува јазот меѓу богатите и сиромашните. Влада која е дел од олигархиската структруа, никогаш нема да воведе прогресивни даноци, не само на личен доход, туку и на данок на добивка, а посебно нема да преземе чекори за воведување на данок на луксуз. Буџетот ќе го полни со покачување на цените и со нови задолжувања.

ПОЛИТИЧКА ПАРТИЈА ЛЕВИЦА
26.11.2022

Loading

ПОСЛЕДНИ ОБЈАВИ