Јас сум дипломиран правник, магистер во областа на миграции од Универзитетот на Оксфорд. Во текот на животот бев активист кој беше инволвиран во протестите против полициската бруталност на Алфите во Шуто Оризари и несоодветните услови за живеење и нееднаквиот третман при вработување и образование во Македонија.

Пораснав како дете без родители во улиците на Шуто Оризари и станав првиот Ром кој магистрирал на еден од најдобро рангираните универзитети во светот, Универзитетот на Оксфорд.

Се залагам за унапредување, модернизирање и подобрување на условите за домување, вработување и образование на луѓето во единствената ромска општина во Македонија, Шуто Оризари.

Кратка биографија (образование, професија и работно искуство)

Дипломиран правник, магистер во областа на миграции од Универзитетот на Оксфорд. Поседувам национално и меѓународно работно искуство од организации за човекови права како што се ОБСЕ, ОДИХР, УНИЦЕФ, ЕРРЦ. Јас сум и долгогодишен активист кој организира масовни протести против полициската бруталност на Алфите во Шуто Оризари, етничката профилираност на Ромите при граничните премини во Македонија, несоодветните услови за живеење и нееднаквиот третман при вработување и образование во Македонија.

Мотивација за вклучување во политика

Верувам во тезата дека „треба да бидеш промената која сакаш да ја видиш“. Затоа, е неизбежно доколку сакаме промени во нашата заедница, во нашата населба, во нашата држава, потребно е и самите да се вклучиме во процесите на ноење одлуки и креирање политики.

Што сакам да постигнам и променам во моето опкружување и општеството?

Да нема злоупотреба на службена должност за лични интереси, и истата да се оптимизира за колективни интереси!

Да има еднаквост, правда и владеење на правото без разлика на нашите општествено креирани разлики!

Етничките димензии на нашиот идентитет да не ја детерминираат нашата компетентност!

Да преферираме квалитет, наместо квантитет! И да креираме кохезија, наместо поделби!

Зошто ја избрав и се кандидирам преку Левица?

Поради калибарот што го поседува претседателот и раководството на Левица, поради нивниот етос, поради нивниот морален компас, поради нивната храброст и борбеност. Ретки се таквите во Македонија! Секоја птица под свое гнездо. Порано или подоцна луѓето од ист калибар се соединуваат, променуваат и победуваат!

Мојата порака до народот

Ако ние самите не си помагаме и не се цениме, некој друг од страна нема да дојде да ни го направи тоа.

Време е за правда! Време е за промени! Време е за подобри времиња!