Добредојдовте на официјалната веб-страница на Левица

More

    Ванчо Ристов
    носител на советничка листа во Општина Чешиново-Облешево

    Накратко би се опишал како човек кој никогаш не мирува. Постојано сум активен, ангажиран, живо заинтересиран за сè што се случува во опкружувањето и во општеството.

    Кратка биографија (образование, професија и работно искуство)

    Роден сум во 1969 година, пораснав и живеам во Облешево. Оженет, реализиран како родител. Средното образование го завршив во Струмица, а потоа дипломирав на Педагошкиот факултет во Штип. Животните околности и моите бројни интереси ме имаат водено низ различни животни води. Големата љубов кон музиката и стекнатото музичко образование (имам завршено нижо музичко училиште) придонесоа 15 години да работам како музичар, бас-гитарист во музичката група „Акорди“ со која имаме настапувано и на неколку фестивали. Потоа, откако се стекнав со соодветна виша инструкторска спрема за возачи, почнав да работам како инструктор, работа со која и денес се занимавам во автошколата „Фокус“ Кочани. Активно спортував и играв фудбал долги години, а потоа волонтерски ги тренирав фудбалерите на ФК „Облешево“ од Облешево. Имам оформено и екипа за футсал чиј тренер сум, а којашто се натпреваруваше во Втора лига на Македонија.

    Мотивација за вклучување во политика

    Политиката ме привлекува и ме интересира уште од младоста. Како младинец со левичарски идеи, во време на СФРЈ, завршив и Политичка школа. Сметам дека не постои подобар начин да се движи и менува општеството, отколку активното вклучување во политичкиот живот.

    Сè што е погрешно во државава, погрешно е поради лоши политики. И, како што народот мудро вели: „Од што е болеста, од тоа е и лекот“, сметам дека лек за лошите политики се добрите политики. Само со донесување и спроведување квалитетни политики може да се надминат хаосот и неправдите што ги трпиме сите овие години.

    Што сакам да постигнам и променам во моето опкружување и општеството?

    Многу ми пречи падот на квалитетот на живеење во општина Чешиново- Облешево. Ќе се заложам општинските власти активно да се вклучат во надминување на проблемите со откупот на ориз. Исто така сметам дека со општинските пари не се работи домаќински. Избраните членови од листата на Левица во советот на општината ќе се заложат против скапи, преплатени тендери и ќе настојуваат секој денар да се вложи на вистинско место, за решавање на проблемите и потребите на жителите.

    Најитно мора да го решиме, со трајно и квалитетно решение, прашањето на водоснабдување во Облешево и Чифлик. Ќе се борам и за тоа на општинскиот фудбалски клуб да му обезбедиме средства за непречено да се натпреварува во Третата македонска лига.

    Зошто ја избрав и се кандидирам преку Левица?

    Левица е мојот избор затоа што е различна и функционира на поинаков начин од сите партии кои изминативе триесет години имаат продефилирано на политичката сцена во Македонија. Јас како и многу други жители на Чешиново- Облешево ја гледаме како светлина на крајот од тунелот, целата наша надеж е вложена во неа.

    Мојата порака до народот

    Неопходно е да се стави крај на корупцијата, криминалот и беззаконието, а општините да почнат да работат за интересите на сите свои жители. Ќе се залагам сето тоа да го направиме реалност и на крајот од мандатот со чист образ да застанеме пред граѓаните.