Амар Мециновиќ, член на Президиум и потпарол на Левица

Кратка биографија

Политиколог и активист за социјална правда. Член на Президум на Левица како највисоко раководно тело и портпарол, одговорен за комуникација со јавноста преку медиумите. Од почетокот на 2022 година – избран претставник на народот како член на Советот на Град Скопје. Во рамки на еден турбулентен мандат за градот, заедно со советничката група, нашите заложби беа и се базирани на: социјална платформа, заштита на работничките права, јакнење и проширување на јавните капацитети, кои ни се отуѓени, и еколошки свесна политика.

Мотив за активно влегување во политика

Дел сум од генерацијата која нема избор, освен да стане политички активна. Видовме како нашите родители, баби и дедовци беа прелажани и изгубија сè. Израснавме прилагодувајќи се на сè помалку и на сè полошо од година во година. Затекнати сме во општество на кое му беше растурено заедништвото на сметка на индивидуализмот и конзумеризмот, со цел да нè разделат и да профитираат од нашите животи.

Гледајќи ги небулозите околу нас, неминовно е да се запрашаме:

Каква е таа слобода на индивидуата со која нè убедуваат дека сме на прав пат кога сведочиме како безброј наши другарки и другари се иселуваат, а на оние кои остануваат, потенцијалот и среќата им згаснува поради економска нерамноправност?

Какви се тие предодредени судбини во кои некои имаат сè, додека другите немаат ништо?

Сосема јасно е дека насила и нелегално ни ги крадат условите за живот! Тоа што ни го одземаа, природно е да го замениме со гнев и непоколеблив порив за борба.

Од нас создадоа непријатели со мотив поголем, поистраен и повозвишен од нивниот. Затоа што наместо за профит, нашата борба е за слобода, достоинство и класно ослободување.

Нашиот мотив е суштински, искрен и црвен. Затоа е и победнички.

Време е млади и чесни луѓе да ги исфрлат од институциите дотраените квазиполитичари. Тие 33 години ја докажуваат својата колосална неспособност, а ги амнестираат крадењето и корупцијата. Доста е!

Левичарски вредности во кои верувам

• Единство!
• Борба!
• Човекољубие!

Само со левичарските вредности во основата на политичките одлуки, можеме да се надеваме на иднина, која ќе донесе просперитет за луѓето.

За што се залага Левица во Собранието и во иднина, од позиција на власт?

Левица е создадена за да ја вратиме Македонија на народот! Да ги заштитиме националните интереси на македонскиот народ! Да ги искинеме прангите на потчинетоста, наметната од неспособни и корумпирани самонаречени државници! Да ја запреме отворената сегрегација и трибализација на општеството! Низ нашата разединетост паразитираат криминалните политички елити, со што нè спречуваат да станеме модерна и стабилна земја. Поделбата е криза што ги разорува врските и ни ги слабее темелите.

Народна и средена Македонија е реалност.

Не постои невозможно со доволно политичка волја и силна политичка позиција. „Програмата, 2024“ на Левица, меѓу другите, содржи и решенија за политички систем и надворешна политика, како клучни за иднината на Републиката.

Дел од нив се:

• Поништување на сите штетни антимакедонски договори : Охридскиот рамковен договор, Преспанскиот договор со Грција, Договорот за добрососедство со Бугарија и прекин на преговорите;
• Декларација за ништовност на криминалните нелегални уставни амандмани од Преспанскиот договор со цел враќање на уставното име „Република Македонија“!;
• Потпишување Македонска платформа од страна на сите промакедонски политички партии, со цел утврдување национален консензус заради превенција од уцени;
• Поништување на илегалната двојазичност на целата територија на Републиката;
• Укинување на контроверзното двојно или т.н. Бадентерово мнозинство при носењето на некои закони;
• Намалување на бројот на пратеници во Собранието на РМ – од 120 на 100;
• Организирање на Република Македонија во една изборна единица без изборен праг (цензус);
• Воведување на отповиклив пратенички мандат;
• Укинување на привилегиите, патните трошоци и апанажите на избрани и именувани функционери;
• Забрана на чисто етнички партии и здруженија;
• Забрана за предизборни коалиции;
• Развивање на кориснички дигитални платформи и мобилни апликации за многубројни е-услуги;
• Суверена надворешна политика во корелација со одржлив и правичен економски развој за државата, која ќе води сметка за националните интереси на конститутивниот македонски народ и државата;
• Основање на екстерен советодавен Центар за геостратешко планирање составен од научни работници и специјалисти за планирање и позиционирање на Републиката во мултиполарниот свет;
• Градење добрососедски односи, како со непосредните соседи, така и со земјите од екс-југословенскиот простор, преку зголемување на политичко-економските врски;
• Олеснување и помош за добивање македонско државјанство на Македонците во соседните земји и ширум светот!;
• Запирање на погубниот процес на косоваризација на македонската дипломатија, преку забрана за лица со двојно државјанство да бидат наши амбасадори или генерални конзули во странство!;
• Прекин на воведувањето неосновани и препишани санкции наметнати од т.н. Колективен Запад (ЕУ, САД и Велика Британија), кои се штетни и за македонската економија;
• Создавање на услови за воведување безвизен режим со секоја постојана земја-членка на Советот за безбедност на ООН + со други земји ширум светот;
• Издигнување на билатералните односи со Народна Република Кина на ниво на стратешко партнерство;
• Воспоставување стратешко партнерство со Руската Федерација, по примерот на стратешкото партнерство со САД;
• Воспоставување и развој на сестрани односи со други меѓународни организации, согласно геополитичките прилики во Новиот мултиполарен свет:

• Движењето на неврзаните;
• БРИКС;
• Европската-еконономска заедница (ЕЕЗ);
• Евро-азиската унија (ЕАУ);
• Договорот за пријателство и соработка со земјите од Југоисточна Азија (АСЕАН) и др.

• Продолжување на евроинтеграциите, исклучиво, на достоинствена и рамноправна основа, со јасни црвени линии: во процесот на преговори, Македонија да биде индивидуално вреднувана, без ставање во пакет со други земји; целосно отфрлање на т.н. Француски предлог, како неприфатлива и понижувачка рамка за продолжување на евроинтеграциите; оценувањето на напредокот да биде, исклучиво, во рамки на усвоените Копенхашки критериуми без било какви отстапки по националните и идентитетските прашања.

Порака до народот

Левица е единствената партија, која активно ги разбива тридецениските лаги, со кои политичката олигархија ја одржува и легитимира превласта над обичните луѓе.

Дома ни создадоа немир и регрес, надвор ги потчинија државните позиции и интереси! Името, културата, јазикот и историјата се наше право на самоопределување и вистина.

Како одговор на ова зловреме во кое живееме, повеќе отсекогаш е потребна единствена и освестена политичка нација, како основен предуслов за стабилност и економски просперитет на Македонија.

Доволно поминавме како народ, за да знаеме дека молбите кон опресорот да ни се смилува, не функционираат! Мораме да се бориме и да ги потсетиме нашите блиски дека сè уште имаме за што да се бориме! 

„Работниот народ нема што да изгуби, освен своите окови. А може да го добие сиот свет!“ (К. Маркс).

Вашиот глас е вашето оружје за одмазда! 

Излези и ГЛАСАЈ за Левица!
НЕПОДМИТЛИВИТЕ ВО СОБРАНИЕТО!
#НемаВладаБезЛевица
ЗАОКРУЖИ 5