Вчерашниот ден Владата го одбележа со прослава на т.н Преспански договор. Прославата на овој капитулантски договор, тие ја искористија за бесрамно исмејување со македонскиот јазик. Имено, најавија иницијатива за „основање на Центар за грижа и промоција на македонскиот јазик во Љубојно“. Тоа нѐ тера да се запрашаме: Дали македонскиот јазик ќе го промовираат пред камењата во Љубојно?
Во ситуација кога македонскиот јазик е целосно запуштен од страна на државните институции, а и се наоѓа пред сериозен и агресивен напад од страна на бугарската држава, ова е уште еден пример што ја покажува намерата на Владата да продолжи во походот кон целосна ревизија на македонскиот идентитет.
Владата негува анти-државничка сервилност кон Бугарија и истата ја нарекува „добрососедски односи”. Ваквата состојба претставува сквернавење на споменот на анти-фашистичката борба и соучесништво во обидот на Бугарија да ја ревидира македонската историја. Не чуди тоа што Владата на никаков начин не го одбележа масакрот во Ваташа, најголемиот злочин (заедно со Дабничкото клање) во времето на Втората светска војна во Македонија, кога бугарскиот фашистички окупатор застрела 12 младинци од 15 до 27 години.
Потсетуваме дека неодамнешниот Извештај на Советот на ЕУ (кој дома го прикажуваа како успех на патот кон ЕУ!), вклучува и долга изјава на Бугарија, полна со уцени во која, меѓу другото, таа бара Европската унија да не употребува „македонски јазик” во официјалните документи, а наместо тоа да го употребува терминот „Официјален јазик на Република Северна Македонија”. Во истиот извештај, Бугарија бара Македонија и ЕУ целосно да го негираат постоењето на македонско малцинство во Бугарија и да ја негира сопствената антифашистичка историја. Владата на СДС во ниту еден момент не излезе со реакција за ваквата подмолна политика од страна на нивниот пријател, Бугарија.
Покрај нападите во меѓународните организации, македонскиот јазик е под оркестриран напад и на Интернет. Мноштво содржини на Википедија се намерно и тенденциозно ревидирани во обид да се смени или целосно избрише историјата на македонскиот народ и македонскиот јазик. Дополнително, алатката за превод на гугл автоматски го препознава македонскиот како бугарски јазик. Имајќи ја во предвид важноста на Интернетот како најважна современа платформа за ширење на информации, ова претставува уште еден фронт каде македонската држава ја губи битката за сопствениот идентитет. Наместо стратегија за промоција на македонскиот јазик по меѓународни институции и други платформи како Интернетот, Владата бесрамно нуди апсурдни и глупи иницијативи за промоција на македонскиот јазик во Љубојно!
Уште посрамен е молкот на Македонската академија за науки и уметност, што е и своевидна навреда за ликот и делото на првиот претседател на МАНУ, академикот Блаже Конески. Потсетуваме дека оваа институција, под раководство на низа послушници-академици, доброволно се преименува во Академија на науките и уметностите на Република Северна Македонија.
