Иако владата на СДСМ еуфорично најави дека не постои опасност за губење на УНЕСКО статусот на Охридско езеро, таа одбива да ја спроведе главната препорака на Реактивната мониторинг мисија на УНЕСКО: воведување на мораториум на сите крајбрежни и урбани трансформации во Охридскиот регион. Дополнително, на една од седниците на Владата беа усвоени информации кои се однесуваат на активности во Охридскиот регион, а кои предвидуваат крајбрежни трансформации на Охридското езеро.

Ваков допис испратија денес три еколошки органзиации со барање до премиерот Заев во рок од 30 дена да воспостави итно воведување на мораториум на сите градежни активности во Охридскиот регион. Здруженијата потенцираа на фактот дека изминатиов период засилено се изведуваат градежни активности на Охридското крајбрежје, како продолжување на спорната изградба на хотелот во Лагадин. Овие денови исто така струшка локална иницијатива апелираше за нелегално изведување градежни активности со тампонирање и сечење трска на струшкото крајбрежје. Иако од струшката иницијатива беше поднесена пријава до повеќе локални и државни органи за изведување незаконски градежни работи во заштитен природен појас, сè уште нема никаков одговор, ниту од надлежните институции, ниту од јавно повиканите функционери.

Молкот и непреземањето никакви дејствија за спречување на градежната експанзија која зема замав на охридско – струшкото крајбрежје води до сомнение за штитење на силни бизнис интереси од страна на владата, при што директно се загрозува статусот на Охридското езеро. Левица е против уништувањето  на природните богатства заради остварување на мегаломански профити од страна на поединци и реализирање партиски договори и затоа силно го поддржува барањето за итно воведување на мораториум на Охридското крајбрежје.