Огромните пожари кои секојдневно горат на цела територија на државата ја демонстрираа целосната нефункционалност на институциите. Застарените возила стари 40 години, недоволниот број на стручен кадар и неинвестирањето во современа опрема го отежнува гаснењето на пожарите, по примерот на Скопска Црна Гора, каде пожарот продолжи да гори и во текот на ноќта.

Меѓу другото, тројно е зголемен бројот на пожари во изминатите три месеци во однос на минатата година, додека нема никакви информации од надлежните органи за осомничени сторители и покренати кривични пријави! Граѓаните обвинуваат дека интензивно се пали трска заради ослободување простор за приватни плажи, дека се подметнуваат пожари од страна на шумската мафија, а од министерот Спасовски добиваме само молк и апели да не се палат пожари!

Наместо сериозни инвестиции и модернизација на клучните државни сегменти за справување со кризи, парламентарните бизнис-партии пред два дена одделија износ од 750 000 евра за службени патувања, односно обичните граѓани дневно ќе плаќаат речиси 700 евра само за луксузните патувања на функционерите.

Ваквите корумпирани и криминални политики на сите досегашни партии на власт резултираа со немање базичен систем за заштита на безбедноста на граѓаните, при што и мали природни непогоди резултираат со огромни последици, некогаш дури и со човечки животи.

Президиум на Левица